Kryetari i degës së PDK-së në Skenderaj, Sami Lushtaku ka thënë se me dhimbje të madhe e ka marrë lajmin për vdekjen e Haxhi Thaçit, babait të ish-presidentit Hashim Thaçi.

Me anë të një postimi në Facebook, Lushtaku tha se pavarësisht sfidave dhe mallit të pashuar për birin e tij, ai mbeti gjithmonë krenar për kontributin e djalit të tij.

Postimi i plotë:

Me dhimbje të madhe morëm lajmin për ndarjen nga jeta të Bacës Haxhi Thaçit, babait të Presidentit Hashim Thaçi. Baca Haxhi Thaçi, një burrë i urtë, me vlera të larta familjare dhe kombëtare, qëndroi gjithmonë i fortë përballë sfidave dhe sakrificave që përjetoi familja e tij gjatë periudhave më të vështira për lirinë e Kosovës.

Ai ishte një prind i përkushtuar, i cili jo vetëm që rriti një lider dhe luftëtar të lirisë, por edhe qëndroi i pathyer përballë përndjekjeve dhe sakrificave që familja Thaçi përjetoi gjatë periudhave të ndryshme të kohës. Pavarësisht sfidave dhe mallit të pashuar për birin e tij, Presidentin Hashim Thaçi, Baca Haxhi mbeti gjithmonë krenar për kontributin e djalit të tij dhe për lirinë, pavarësinë dhe shtetndërtimin e Kosovës.

Ngushëllime të sinqerta Presidentit Hashim Thaçi, gjithë familjes Thaçi, miqve e dashamirëve. Pushoftë në paqen e përjetshme.